Kulankan oo dhexmaray golaha muslimiinta ee dalka South Africa MJC, jaaliyadda iyo Safaaradda Soomaaliyeed ee dalka Koonfur Africa ayaa waxaa lagu lafaguray arrinta ku saabsan muwaadin Soomaaliyeed oo dhawaan middi ku weeraray dad ku cibaadeysanayay masjid ku yaala xaafad lagu magacaabo Mamesbery oo hoos timaada magaalada Cape Town, waxaana uu halkaasi ku dilay laba kamid ah dadkii ku sugnaa masjidka oo mid uu Soomaali yahay halka uu dhaawac u geystay labo kale, isagiina ay tooigteen police-ka kadib markii uu ka dhaga adeegay inuu isu dhiibo.
Markii uu soo dhamaaday kulankaasi oo saacado qaatay ayaa Golaha Muslimiinta Koonfur Africa MJC iyo Safaaradda Soomaaliya waxay si wadajir ah u soo saareen shir saxaafadeed ay ku faah-faahinayaan waxyaabihii la isla meel dhigay, waxaana kamid ahaa qodabada ugu muhiimsan.
In labada dhinacba ay cambaareeyeen falkii foosha xumaa ee ka dhacay gudaha masjidka Malbesbury oo ku yaala meel u dhaw magaalada Cape, Town 14 June 2018, waxayna u duceeyeen qoysaskii ay waxyeelada ka soo gaartay.
MJC waxay markale xustay xiriirkii dheeraa ee kala dhexeeyay jaaliyadda Soomaaliyeed iyo hoggaamiyayaashooda ku sugan South Africa. MJC waxay qirtay iney aqoonsantahay kaalinta ay Soomaalida kaga jirto bulshada iyo dhaqaalaha South Africa.
Bulshada Soomaaliyeed waxay si wanaagsan u dhexgashay bulshada South Africanka ah, iyadoo qaar badanoo kamid ah ay noqdeen muwaadiniin South African ah.
Waxaa la isku raacay in si joogta ah loo kulmo, leyskuna dhaafsado warbixinada si walba oo suuragal ah, si loo muujiyo isku xirnaasho.
Safiirka Soomaaliya ee South Africa Jamal Barrow wuxuu ku dhiiragaliyay dhammaan Soomaaliga in ay ka shaqeeyaan nabadda iyo horumarka South Africa.
MJC iyo jaaliyadda Soomaaliyeed waxay si wada jir ah ula shaqeyndoonaan dhammaan waxyaabaha ay dowladda uga baahantahay si loogu adeego danaha dalka iyo bulshooyinka ku nool.
Wali waxaan sugeynaa warbixinta ay soo saari doonaan laamaha dambi barista ee dalka. Sikastaba ha ahaatee xogta la helayo ayaa sheegeysa in qofka wax dilay inuusan aheyn qof daggan.
Sources: wakaaladda.com
