Kulan cilmiyeed ay aqoonyahano ka qeybgaleen oo lagu qabtay Cape Town

Cabdikariim Mursal Faarax | Cape Town, Koonfur Afrika

Kulan cilmiyeed lagu qabtay jaamacadda Stellenbosch qeybteeda ku taala xaafadda Bellville ee ka tirsan magaalada Cape Town, ayaa waxaa ka qeybgalay qaar kamid ah jaaliyadda Soomaalida ah ee ku nool dalka South Africa, waxaana marti ku ahaa Xildhbaan Abdifatah Ismaaciil Daahir iyo Prof Abdi Ismail samatar oo markii ugu horeysay South Africa kusoo bandhigay buugiisa Cusub ee uu ugu magacdaray Africa’s First Democrats ama Hormuudka Demoquraadiyadda Africa.

Kulan cilmiyeedkan oo sanadkiiba mar lagu qabto magaalada Cape Town islamarkaana lagu casuumo aqoonyahano Soomaaliyeed, ayaa waxaa soo abaabulay Ururuka Ardayda Soomaaliyeed ee Dalka South Africa. Guddoomiyaha ururkaasi Maxamuud Cabdirisaaq Cali Mire oo warbaahinta lahadlay ayaa waxaa uu sheegay in ururka ardayda uu u taaganyahay wax walba oo bulshada faa’ido u ah, waxaana jecelnahay ayuu yiri in marwalba aan isku xirno bulshada, aqoonyahanada iyo madaxda qaranka.

Xildhibaan Abdifatah Ismaaciil Daahir oo ka tirsan Baarlanaaka Soomaaliya oo socdaal gaaban ku jooga dalka South Africa, ayaa waxaa uu ka hadlay dib u dhiska Dowladnimada Soomaaliya iyo waajibaadka ka saaran dhalinyarada Soomaaliyeed MustaqbalkaDalka iyo taabagalinta dowlad Soomaaliyeed oo ka duwan dowladihii inaga dumay oo aan dib u bur-burin.

Profesor Cabdi Ismaaciil Samatar oo kamid ah aqoonyahanada Soomaaliyeed kuwooda ugu caansan oo marti ku ahaa kulan cilmiyeedka ayaa waxaa uu halkaasi kusoo badhigay buuggiisa Africa’s First Democrats ama Hormuudka Demoquraadiyadda Africa kaasoo uu kaga hadlayo kaalintii Soomaaliya ay ka qaadatay dimoqraadiyadda Africa, taasoo ku abtirsaneysa madaxdii qaranka Soomaaliya ee lixdamaadkii sida Aadan Cabdulle Cismaan(Aadan Cadde) iyo Cabdirisaaq Xaaji Xussein.

Kulankan oo sanadkiiba mar laqabto waxaa isugu yimaada qeybaha gala duwan ee bulshada Soomaaliyeed oo dhalinyaro u badan, kuwaas oo qaarkood kayimaada gobalada dalka South Africa, waxaana uu gogol dhiggiisu yahay in da’yarta la xusuusiyo midnimada Ummada Soomaaliyeed iyo waajibaadka ka saaran mustaqblakaDalka.

Cabdikariim Mursal Faarax

Amfarah777@gmail.com

Cape Town, South Africa.