Abdikarim Mursal farah | Johannesburg
Dalka South Africa oo mar walba lagu dhibaateeyo Soomaali badan oo ku dhex nool, ayaa xalay waxaa meel u dhaw magaalada Cape Town lagu dilay qof Soomaali ah oo ka xamaalanayay mid kamid ah dukaamada Soomaalida ay ku leedahay halkaasi.
Qofka la dilay oo wiil dhalinyaro Soomaali ah, ayaa xalay Fiidkii kooxo hubeysan waxaa ay ku qaarajiyeen goob ganacsi ee uu ka shaqeynayay oo ku taala tuulo lagu magacaabo lowery pass oo u dhaw deegaanka Staran oo 30km dhanka waqooyi kaga beegan magaalada Cape Town. Ragga habeysan ayaa sida la sheegay waxaa ay soo galeen gudaha dukaanka, iyagoo ku labisan dharka shaqaalaha, waxayna marxumka u sheegeen in uusan heynin alaabta ay raadinayaan. markii ay banaanka u wada baxeen, ayaa laba daqiiqo kadib waxaa ay dib ugu soo laabteen dukaankii oo durbadiiba waxay xabad ku bilaaben qofkii dukaanka joogay oo ahaa qorka dhintay.
Sida uu ii sheegay guddoomiye ku xigeenka Save Somali Communit Cabdi Calas Guure, majirto cid gacanta lagu soo dhigay oo lagu eedeeynayo falkaasi, waxaana socda ayuu yiri baaritaan ay wadaan booliiska oo lagu baadi goobayo kooxdii dilka geysatay iyo cid walba oo falkaasi looga shakiyo.
Cabdi Calas oo aan khadka telephone-ka ku wareystay ayaa waxaa uu nasiib daro ku tilmaamay in South Africa ay ku taallo Safaarad Soomaaliyeed, balse aysan ka warheynin dhibaatooyinka joogtada ah ee dadka Soomaalida ah loogu geysto gudaha dalka South Africa, waxaana habooneyd ayuu yiri in dadkooda ay dhibaatada la qeybsadaan oo ay garab istaagaan, halkii ay iska inta tiri lahaayeen. Masuuliyadda safaaradda loo idmaday ma ahan oo kaliya ayuu yiri in dadka ay usoo saaraan baasaboor ay dadka lacago ku bixiyaan.
Wiilka la dilay oo lagu magacaabi jiray Maxamed Ibraahim Calasoow ayaa waxaa uu dhashay sanadkii 1981 wuxuuna kamid ahaa bulshada Soomaaliyeed ee in mudda ahba ku noolaa dalka South Africa, waxaana la filayaa in maanta lagu aaso qabuuraha muslimiinta ee magaalada Cape Town.
Xigasho: wakaaladda.com
