Munaasabadaan oo aheyd mid lagu soodhaweenayay danjiraha cusub ee Soomaaliya u joogi doona dalka Koonfur Afrika danjire Jamaal Mxamed Barrow ayaa waxaa kasoo qeyb galay qeybaha kala duwan ee Jaaliyadda sida; aqoonyahanada, culumada, odayaasha dhaqanka, ganacsada, haweenka iyo dhalinyarada, kuwaasoo soodhaweyn ballaaran usameeyay danirahooda cusub.
Munaasabada oo ay khudbado kookooban kasoo jeediyeen xubno ma talayay qeybihii kasoo qeyb galay xaflada kuwaasoo bogaadin iyo soodhaweyn u muujiyay Danjire Jamaal Maxamed Barrow ugana warbixiyay xaaladaha nololeed ee ay ku noolyihiin dalkaani Koonfur Afrika, iyagoo usheegay inay jaaliyadu qabto dhibaatooyin kala duwan oo xaga sharciga, ganacsiga iyo howlmaalmeedyada ay ku leeyihiin dalkaani Koonfur Afrika.
Maxamed Cali Mire qunsulka Safaaradda Soomaaliyeed ee Koonfur Afrika oo isagu ahaa siihayihii safiirka tan iyo intii uu geeriyooday safiirkii hore ee Safaaradda Soomaaliyeed ee Koonfur Afrika marxuum Sayid Shariif ayaa ugu horeyn ka codsaday jaaliyada inay u hanblyeeyaan Safiirkooda cusub, kalana shaqeeyaan sidii uu ugudan lahaa shaqadiisa, una dhowri lahaayeen dukumintiga iyo jiritaanka safaarada, kana hortagaan ajaanibta badan ee wadankaan ku jooga magaca Soomaaliyeed ee sharaf dilayo karaamada ummada Soomaaliyeed.
Danjire Jamaal Maxamed Barrow Safiirka Safaaradda Soomaaliyeed ee Koonfur Afrika oo ka hadlayay munaasabadii lagu soo dhaweenayay xilkiiisa cusub iyo imaanshihiisa ayaa ugu horeyn u mahadceliyay maamulkii iyo shaqaalihii hore ee howsha safaaradda soo waday, isagoo u balan qaaday inuu u kordhin doono mas’uuliyadooda iyo shaqadooda, wuxuu tilmaamay in wax badan laga badali doono howlaha safaaradu u heyso jaaliyada, higsiga safaaradda ee 2016-kana uu yahay hanashada xiriirka labada dal iyo lahaanshaha dhismaha iyo dhulka safaarada, wax badanna sharciyada muwaadiniinta Somaaliyeed ay ku joogaan wadanka wax laga qaban doono, taasna lagu gaari doono in jaaliyadu garab istaagto howlwadeenada safaarada.
Kulankaan oo ahaa kulan ay kasoo wada qeyb galeen xubno kala matalayay gudiyada jaaliyadaha ka dhisan sagaalka gobal ee wadankaan Koonfur Afrika uu ka kooban yahay ayaa kusoo gabagaboobay jawi farxadeed iyo niyada wanaag ay muujinayeen dhammaan qeybihii kasoo qeyb galay kuwaasoo u riyaaqay sida uu safiirkoodu ugu soo biiray iyo howlaha uu higsanayo oo ah kuwii ay u baahi qabeen tan iyo intii ay labaatan sano ka hor qaarkoon yimaadeen dalkaani Koonfur Afrika.
Mahad Maxamed Sheikh (Istiila)
E-mail: istiile@hotmail.com
Pretoria, South Africa
