Abdikarim Mursal Farah | Cape Town.
Xildhibaan Yuusuf Xeyle Jimcaale oo maalmo ku sugan dalka South Africa ayaa dhawaan waxaa uu soo gaaray magaalada Cape Town ee dalka South Africa, waxaana jaaliyadda Soomaaliyeed ee magaaladaasi ay u sameysay munaasabad Afur ah oo ay ka soo qeybgaleen dad ka badan 100 qof.
Munaasabadan lagu soo dhaweynayay xildhibaanka ayaa waxaa lagu qabtay hotelka Capetonian oo ku yaala bartamaha magaalada Cape Town, waxaana soo abuubalay shaqsiyaad kamid ah ganacsatada Soomaaliyeed ee magaaladaasi oo sheegay in ay aad ugu farsanyihiin ka qeybqaadashada soo dhaweynta xildhibaan ka socda baarlamaanka Soomaaliya.
Xildhibaan Yuusuf Xeyle oo khudbad dheer u jeediyay jaaliyadda ayaa ugu horeyn waxaa uu mahadnaq gaar ah u jeediyay cidda soo qaban qaabisay munaasabaddaasi soo dhaweynta ah iyo guud ahaan dadka Soomaalida ah ee ku sugan magaalada Cape Town, iyo sida wanaagsan ee ay soodhaweyntiisa uga wada qeybqaateen. Intaa kadib waxaa uu jaaliyadda warbixin guud ka siiyay isbadalka baarlamaanka iyo guud ahaanba dowladda cusub.
Waa xildhibaankii ugu horeeyay ee ka tirsan baarlamaanka cusub ee Soomaaliya oo soo gaaro magaalada Cape Town ee dalka South Africa, waxaana la filayaa in uu dhawaan dib ugu laabto caasimadda Soomaaliya ee Muqdisho.
Xigasho: wakaallada.com
