Gabaron, (Botswana) – In ka badan Soddon ruux oo Muwaadiniin Soomaaliyeed ah oo qaarkood ay caafimaad ahaan aad u liitaan, ayaa laga siidaayey Xabsiyo ku yaalla Dalka Botswana, kuwaasi oo in muddo ah ku xirnaa xabsiyadaasi, sida la xaqiijiyey.
Maxaabiistan Soomaaliyeed ee xoriyadooda heley oo gaaraya ilaa 34 qof, ayaa qaarkood soo dhamaystay xukuno ay ku fulisay dowlada Botswana, oo ah min Laba sanno oo xarig ah, halka kuwa kalena ay cafis u fidisay ayagoo lagu amray in ay si deg deg ah dalka Batswana ugu baxaan dhankii ay doonaan, sida ku cad warqadda xabsiga looga siidaayey.
Qaar ka mid ah ayaa waxa ay danta u sahashay in ay ka soo talaabaan xadka u dhaxeeya dalalka Batswana iyo South Africa, waxayna iminka si nabad ah usoo galeen gudaha dalka K/Africa kaasi oo markii hore hamigooda ahaa, sida uu goor dhow ay ii xaqiijiyeen Laba ka mid ah dhallinyaradaasi Soomaaliyeed oo aan xiriir la sameeyey.
Maxamed Cabdi, ayaa ii sheegay in ay xoryihiin iminka sidoo kale wuxuu sheegay in ay weli xabsiyada ay ku jiraan muwaadiniin Soomaliyeed, wuxuuna fariin ka socota Maxaabiista ku xiran Dalka Batswana u diray Dowladda Soomlia gaar ahaan Wasiirka Arrimaha Dibadda, isagoo ka dalbaday in gacan laga geysto dib u helista Xoriyadooda, maadaama ay qaarkood aad u liitaan caafimaad ahaan sida uu yiri.
Botswana iyo Angola, ayaa ka mid ah dalalka tacadiyada xad dhaafka ah loogu gaysto maxaabiista.
Sources: wakaallada.com
